TPA estrena mañana sábadu, 28 de mayu, a las 13:00 la primer temporada de Camín, nueva serie documental de Ramón Lluís Bande y Xosé Ambás que continúa y amplía la propuesta de Camín de cantares nos últimos cuatro años. Nos trece capítulos d'esta primer temporada, la serie va proponer un viaxe per Asturies p'averase a les manifestaciones más enraigonaes de la cultura tradicional. La mayor diferencia de Camín respecto a la so hermana mayor, Camín de cantares, ye que nesta ocasión la propuesta ábrese tamién a les manifestaciones de la cultura material y la forma de vida tradicional: oficios, arquitectura popular, vezos, bailles...
Cola música tradicional, los cantares y otres manifestaciones de la cultura oral, que van siguir siendo l'alma del programa, la serie va acercar a los espectadores asturianos el trabayu de los cunqueiros, de los goxeros, de los madreñeros, de los teitadores, el procesu d'ellaboración del pan d'escanda... Cada capítulu va tar protagonizáu por dos (o más) invitaos y dixebráu en delles partes diferenciaes: entrevistes, cantares, procesos de trabayu... Lo que, en palabres de los sos responsables: "va servir pa enriquecer la propuesta de los últimos años, acercándonos, col mesmu rigor y respetu, a otres realidaes de la nuestra cultura tradicional que "Camín de cantares" nun trataba d'una manera directa".
Na parte musical de la serie vamos alcontrar asturianaes, cantares pa la danza, romances, cuentos o hestories. Too xunto contribúi a proponer un retratu más axustáu de les formes de vida de l'Asturies rural que tovía perviven con vitalidá nos nuestros díes. Como yá yera característico de "Camín de cantares", Ambás percorre Asturies d'oriente a occidente amosando la vitalidá, diversidá y riqueza llingüística del asturiano. Nesta primer temporada'l la serie visita los conceyos de Grau, Degaña, Cangas de Narcea, Somiedu, Ayer, L.lena, Tinéu, o L.luarca, ente más otros.
Camín está producida por De la Piedra y la Productora de Programas del Principado.